Të angazhohemi për ta pasuruar dhe për t’i dhënë mundësi të ardhmes që të flasë me krenari dhe kulturë gjuhën shqipe, si një prej vlerave dhe simboleve më përbashkuese të kombit tonë!
Respekt dhe nderim për burrat e mençur dhe të ditur të kombit shqiptar, të cilët në nëntor të vitit 1908 u mblodhën në një prej qyteteve më të zhvilluara të shqiptarisë së kohës, Manastir, ku me vizion dhe atdhedashuri hartuan alfabetin e gjuhës shqipe, duke i dhënë kombit vlerën e përjetshme përbashkuese dhe identifikuese.

E pozicionuar përherë si krahinë që i ka drejtuar pushkën çdo armiku, Puka nuk është pajtuar as me tiranitë, ndaj dhe shumë krerë dhe përfaqësues të masave popullore iu bashkuan kryengritjes së viteve 1926-1927.
Përurimi i këtij obelisku që përjetëson aktin e tyre të rebelimit qytetar ndaj shtypjes dhe padrejtësive nga drejtuesit e pushteteve është një sensor dhe për situatën e sotme, ku pushteti aktual sillet shpërfillshëm ndaj qytetarëve të tij.
Përveçse ndriçim i fakteve historike, le të shërbejë ky obelisk si një kujtesë për vëmendje tek brezat, pasi mosreagimi apo pajtimi me militantizëm ndaj pushteteve prodhon shtypje dhe mohon liritë.